periodicociudadrealhoy

¿Indenga isï xararajka eska Kristianu?
ITSÏ ATAJTSÏKUA ACHAATIRI
"Eska na itsï atajtsïpka, exespti eska Espíritu Santu ketsekupka"


+Mons. Enrique Díaz Díaz
Obispo Auxiliar
Diócesis de San Cristóbal de Las Casas


Ima nitamakuaru, Jesúsï niaraspti Galilea iorekuaru Jordan arhíkataru ka kurakusïpti Juanuni eska istï atajtsïkupiringa. Ka Juanu no kajtakuaresïrampti, arhíparini: "Jisïni itsï atajtsïakani t´u jimbo, ¿ka t´u jurasïnga par eska jikeni itsï atajtsïkuaaka?" Jesúsï mokukuspti: "U iasï eska nakeni arhíjka, jimboka uetarisïndi eska isï ukuarintaaka iamindu ambe imangui Tata Diosï uekaja". Jimajkani Juanu itsï atajtsïkuspti.
Eka Jesüsï uementapka istïru, enga itsï atajtsïpka, mitakuarentaspti auandaecha ka exentaspti Espírituni Tata Diosïri, imangui ketsekupka ejpuuru eska ma parakata urhapiti ka kuraaspti ma jiguakuarekua auandaru ueratini imangui arhíampka: "Arhí jindesti juchiiti Uajpa xani kani uekati, indengui ji xani k´eri ambe jatsikukani". (Mt 3, 13-17)
No iamindu indengui meremerejkujka
Eska na ukuarejka iamindu k´uinchekuaecharu, tsïmangui k´uinchekua untani japka uekasïramptiks sanderu sesi untani. Ambakiti kustakua, kójtsïkuaecha ujtsïtakata, aspiti t´irekua, kueratasïrampti kauikua. No kuerataspti ma k´uiripu enga arhíapka eska piapiringasï kauikua ma intspekuaru jimangui no xani kanekua jukaparapka eska maruteru isï. "Majku jatsïrakua jindesti, majku atanarikua jukaparasti… per ixu intsïpekuarenasïndi terujkani jukaparakua. Istu jamarasïndi ¿andisïri xani kanekua meiankpea eka nokeni ne Diosï meiamukua intsïnaka?" Eratseparini eska patsakuarepiringaks sani ma tumina, tsïma piasptiks kauikuani, engaks xani arhínaampka. Isï k´uinchekuaru no uanekuaks mitespti eska kauikua no ambakepka, o ekaks mitepka noks ambe uandasptiks. Sani ma juriatekua tatsekua, xararasptiks p´amenchakuaecha: maru k´uiripuecha teruamesptiks ka jiuantasptiks jimbokiks p´amearasïraptiks, jimajkani tsïma k´uiripuecha k´uichekua uriecha mitrsptiks eska ima kauikua no ambakepka. No ma k´uiripu uarikuarespti, per maru k´uiripuecha kanekuaks p´amenchantaspti. ¿Kani jucha mitekuaria eska no iamindu enga meremerjkujka tiripiti jindeska ka indengui isï xararajka mirinarikusïndijtsini?
Itsï atajperakua Jesúsïri
Eka kanguarikua nitamakuarekia Jesúsïri xararakuanguni: imaeri itsï atajperakua. Sontku xararakuarexati kanarikua juchaeri Salvadori eri ka iasï sesi xararakuarentasïndi: Tata Diosï uajpa jindesti, ojchakurakata Espíritu jimbo ka axakata par sesi ambe urpeni uejpekua Tata Diosïri jingoni.
Tata Diosïri uajpa
Ma uenani xararakua Jesúsïri kuraakuaresïndi eka itsï atajtsïjka: "Arhí jindesti juchiiti Uajpa xani kani uekati, indengui ji xani k´eri ambe jatsikukani". Uandakua indengui kuraakuarejka eiangukata Isaíasï jimbo Tata Yaveni: "Ji Achaati ioareskakeni, jupijkusïkakeni jajki, ujkuntasïkakeni ka jindeskari k´eri ambe iretaeri, erajkukua k´eri iretaecheri". Tsïma uandakuaecha jindestiks einkperakuaecha par mandani jucha. Jimbosï iasï, eka mitekuarejkasï itsï atajtsïkukata jucha mitekuarentaaka uekakata, jupijkukata ka untsïkata juchari Taate Diosï jimbo.
Diosï, Taate ambakiti, tunguri arhijpeka eska Tata Kristu jindeka chiiti Uajpa uekakata, ujchakurakata Espíritu jimbo, intsïkua chiiti uajpaechani, kangurikataecha itsï jimbo ka Espíritu jimbo, mitentaakaks ambakekua itsï atajperakuaeri, ukurentani eska siervoecha ka untani chiiti ambakiti uachekuani. Ka isïsti ia.